Xa está á venda o novo traballo de Fuxan os Ventos, Terra de Soños,  no que o estudio Casa de Tolos formou parte do equipo técnico que se encargou da mestura e masterización do concerto, da grabación do "making of" así como da edición do video e autoría do DVD do concerto.

Estamos diante dunha traballo musical indispensable na fonoteca e videoteca persoal, xa non só para as xeracións que viviron e entenderon o sentir musical da mensaxe de Fuxan os Ventos na nosa historia máis recente, se non como par as novas xeracións como legado e estudio do noso patrimonio cultural.

Non é esaxerado dicir que moitos aspectos da música actual de Galiza non se entenderían sen Fuxan os Ventos. Case dúas décadas despois de que o grupo fixese a súa última actuación, o espectáculo Terra de soños brindou ao público galego a oportunidade de gozar do esperadísimo regreso de Fuxan os Ventos aos palcos. Foi esta unha volta que xerou enorme expectación, tanto para os que viviran o nacemento da banda, alá polo ano 1972, e foran partícipes do compromiso que zumegaban as súas reivindicativas letras en galego, como para a seguinte xeración, aquela que medrou escoitando os casetes de Fuxan os Ventos dende o asento traseiro do carro paterno. Tanto uns coma os outros foron os que presenciaron a extraordinaria popularización de cantos tradicionais coma A Carolina e a transformación doutros como a Sementeira en auténticos himnos dun pobo.

Os dous concertos celebrados en Compostela os días 18 e 19 de outubro de 2008, e que logo tiveron a súa continuación noutras ciudades galegas, foron o xérmolo deste disco que agora ve a luz en formato digipack (CD+DVD). Aquela primeira cita no Auditorio de Galiza non supuxo un regreso calquera. Porque na escenificación da estreitísima vinculación entre a canción popular galega e as novas formas de expresión do folque atópase o eixo que vertebra este Terra de soños: amáis das colaboracións dos máis destacados músicos do panorama galego actual, como Xabier Díaz, Guadi Galego, Uxía, Mercedes Peón, Pepe Ferreirós, Rodrigo Romaní ou Nova Galega de Danza, que aportaron un novo sabor aos xa clásicos temas do grupo, Fuxan os Ventos contou co acompañamento dunha banda dirixida por Xosé Lois Romero (Nova Galega de Danza; Vaamonde, Lamas & Romero), artífice tamén dos arranxos instrumentais para este proxecto. Nesa banda figuraron músicos tan destacados coma Guillerme Fernández, Benxamín Otero, Roi Adrio, Simón García ou o cuarteto de corda Saiva Nova (Fernando Docampo, Iván Novo, Rosalía Vázquez e Sergio Sieiro).

Fuxan os Ventos foi, nomeadamente, un grupo comprometido coa identidade de Galiza e cos atrancos que esta sociedade tivo que superar ao longo da súa historia recente. Foron, e son, un grupo que soubo transmitir as súas letras de pólvora e chegar a todas as capas da sociedade e en galego, cousa impensable na metade da década dos setenta.

Con oito discos editados e una traxectoria de máis de trinta anos, Fuxan os Ventos xa traspasou fronteiras e xeracións. Porén, o recoñecemento e a posta en valor da súa achega á cultura galega contemporánea, dende unha óptica renovada e actualizada, é hoxe cando se presentan máis que necesarios. Esa é a razón de ser deste Terra de soños.

Dende Casa de Tolos queremos felicitar a Fuxan os Ventos polo seu traballo en toda a súa dilatada traxectoria. Parabéns.

Máis información na web de Fuxan os Ventos

Adobe Flash Player not installed or older than 8.0.22!

Adobe Flash Player not installed or older than 8.0.22!

Adobe Flash Player not installed or older than 8.0.22!